NYT: Беларусь будуе вайсковую базу ў Асіповічах, там могуць захоўваць ядзерную зброю

Канструкцыі на вайсковай базе падобныя да расейскіх сховішчаў ядзерных боегаловак.

У беларускім горадзе Асіповічах, размешчаным за 190 кіламетраў ад мяжы з Украінай, будуюць вайсковую базу. Магчыма, там будуць захоўваць ядзерную зброю.

Пра гэта паведамляе РБК-Украіна са спасылкай на The New York Times (NYT).

У пачатку мінулага года расейскі дыктатар Уладзімір Пуцін ужо згадваў пра тое, што неўзабаве Расея скончыць будаўніцтва «спецыяльнага сховішча для тактычнай ядзернай зброі» ў Беларусі.

Вышэйзгаданая пляцоўка размешчаная ў 120 мілях (193 кіламетрах) ад украінскай мяжы на вайсковым складзе побач з горадам Асіповічамі. Нядаўна там былі пабудаваныя збудаванні, якія маюць асаблівасці, уласцівыя ядзерным сховішчам на базах унутры Расеі. Як прыклад, зона з высокім узроўнем бяспекі, якая аточаная трыма пластамі агароджы ў дадатак да існага перыметра бяспекі ўсёй базы. Таксама адзначаецца грузавая пляцоўка, злучаная са схаваным падземным бункерам савецкіх часоў.

- Паколькі ядзерныя праграмы вельмі засакрэчаныя, цалкам магчыма, што ў Беларусі ёсць і іншыя месцы, дзе Расея захоўвае боегалоўкі - і Крэмль, магчыма, нават перамясціў некаторыя з іх на аб'ект у Асіповічах, хаця ўсё паказвае на адваротнае, - адзначае NYT.

Напрыклад, пляцоўка размешчаная ў тым жа горадзе, што і беларускія ракеты «Іскандэр», якія, у сваю чаргу, могуць быць выкарыстаныя для запуску ядзерных або звычайных боегаловак.

У 2023 годзе на вайсковай базе таксама з'явіліся новыя загароды, была рэканструяваная крытая тэрыторыя і эстакада для загрузкі грузавікоў. Рэканструкцыі таксама адпавядаюць структурам, якія можна ўбачыць на іншых былых савецкіх ядзерных сховішчах.

Са слоў былога супрацоўніка Пентагона па памяншэнні абароннай пагрозы, канструкцыі на вайсковай базе нагадваюць яму расейскія сховішчы ядзерных боегаловак, якія ён бачыў асабіста.

У тым жа ліку выданне дадае, што пляцоўка абароненая сістэмай супрацьпаветранай абароны.